وأبدأ كلامي واسمي على قلبك
واسلم على عيونك
واحكيلك
وفي كل مرة باسمي حواديتي
بالاقيها على اسمك
صلي وسلم ع النبي الهادي................
افتح عينيك يا صغيري
واسمع قصص
بيت من نحاس
قصر من فضة
وملك يا يمتلك........ أغنيا وفقرا
فرسان ما عادوا بيزوروا ايامنا
حواديت كتيرة كتيرة ولساها بتقول كمان اكتر
لكن ارسمها بعيونك
اسمعها من قلبك
وامسك طرف حكايات عمالة تتشاقى
عمالة تتنطط
على خدودك
خربش ... لون.....ارسم بلاد
اجمل بلاد
بصوابعك النونو
واحلم وعيش حلمك
وقت ما يدق عليك الباب
.......................................................
كان في يا طفلي هناك
وهناك معناها بعيييييد جدا
شايف بعييييييد جدا..........................
كان في ولد غلبان
كان كل قوته حبات البلح
وهدومه تعبانة نفسها ترتااااااح
بيته كل يوم بينام قبل ما ييج الولد وينام
كانت حياته بسيطة... نونو كده زي ملامحك النونو
لكن في وشه الشمسم كانت كل يوم تضحك
وف قلبه بستان يطرح سلاسل حب
شايل ف وسط هدومه الدايبة ضحكاية
عمرها ما تدوب
كان راضي بيغني وبيضحك زيك كده
وتعرف ليه
اكيد كان قلبه من قلبك
كان في كمان زمان وزمان
وزمان يعني بعيد جدا قبل ما تهل ع الدنيا
اه زمان يعني بعيد جدا
كان في راجل عجوز
ماشي بعصاية يسند عليها إيديه
يركن عليها احزانه وملامحه
ويشد من ايده ليوم الي فات
واللي وقع منه
عماله بيلحق ضل قدامه
كانه فراشة مكسورة
وبرده بتحاول تطير
يمشي دقيقة ويقف
ما احنا قلنا عجوز
وف كل مرة يرفع عيونه للسما ويدعي
عارف يقول ايه
يا رب لك حمدي وصلواتي
مديت لي في حياتي
مد لي ف عملي
يفرد ايديه بالقمح ويغني
تنزل طيور عنده
وتاكل حبه ورا حبه
........ من ايده
ومن تاني يرفع للسما عيونه
يا رب لك حمدي
وانا كل لحظة ارفع ايديا واقول
يا رب لك حمدي
يا أغلى نعمة ف الدنيا
تسمع كمان
اسمع يا سيدي كمان
كان في ولد نونو زيك تمام
كانت عينيه.... كانت عينيه... زيك تمام
وملامحه شعره غمازة خدوده.... زيك تمام
يا ترى كان الولد يشبه لك
يا رتى كانت صورته من صورتك
ولا انت يا عمري صبحت كل الناس
2003
أسمع كمان
ردحذفأشكرك
مدونتك بدليل المسله للمدونات النسائيه المصريه